Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн шинэчилсэн найруулгын төслийг танилцуулах, санал авах хэлэлцүүлгийг УИХ-ын даргын 2024 оны 104 дүгээр захирамжаар байгуулагдсан Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийг боловсронгуй болгох асуудлыг судлан санал, дүгнэлт гаргах, холбогдох хуулийн төслийг боловсруулах үүрэг бүхий Улсын Их Хурлын гишүүн, Ёс зүй, дэгийн байнгын хорооны дарга, ажлын хэсгийн ахлагч Б.Баярбаатараар ахлуулсан ажлын хэсэг аймгийн ИТХ, ЗДТГ-тай хамтран зохион байгууллаа.

Засгийн газрын 2024-2028 оны үйл ажиллагааны хөтөлбөрт төрийн худалдан авах ажиллагааны бодлогыг шинэчлэх зорилго тавигдсаны хүрээнд чанарын үзүүлэлтийг чухалчилж, худалдан авах ажиллагаа шударга, ил тод байх нөхцөлийг бүрдүүлэхээр зорьж тус хуулийн шинэчилсэн найруулгад гурван үндсэн өөрчлөлт хийж байгааг танилцууллаа. Үүнд:

Нэгдүгээрт, чанартай худалдан авалтыг бий болгох бараа, ажил, үйлчилгээ нийлүүлэгчийг сонгох үндсэн шалгуурт чанарыг баримтлан сонгосон бараа, ажил, үйлчилгээ авах боломжийг бүрдүүлэх, төрийн худалдан авах ажиллагааны үр ашгийг дээшлүүлэх, ил тод болгох.

Хоёрдугаарт, Мега төслүүдийн худалдан авалт, өндөр өртөгт төсөл, хөтөлбөрийн тендер шалгаруулалтыг зохион байгуулах эрх зүйн орчныг бүрдүүлэх, гэрээний хэрэгжилтийг олон улсын жишигт нийцүүлэх.

Гуравдугаарт, хиймэл оюун ухаан нэвтрүүлэх, худалдан авах ажиллагаанд хиймэл оюун ухаан ашиглах эрх зүйн зохицуулалтыг боловсронгуй болгож, шийдвэр гаргах үйл явцыг хурдасгаж, үр ашгийг нэмэгдүүлэх гэсэн үндсэн агуулгын хүрээнд хуульд тогтоомжид нэмэлт өөрчлөлт оруулахаар ажлын хэсэг ажиллаж байна.

Мөн тендерт оролцох зардлыг бууруулах, маргаан хянан шийдвэрлэх, сургалтын тогтолцоог шинэчлэх зэрэг өөрчлөлтийг шинэчилсэн найруулгын төсөлд өөрчлөн тусгасан байна.